学到了吗打秋风(打秋风为什么叫打秋风)

师爷方言讲故事

 

方言讲故事

师爷慢慢话，偌就静静听奈格讴打秋风，奈格讴敲竹杠？

俺绍兴人长般听倻话：打秋风同来敲竹杠，到底啥意思呢？打秋风：打秋风就是利用自咯身份地位和职务 职权，或者利用各种关系，巧立名目、借名头向有铜钿人家索取钱财咯一种行为因为被敲诈勒索人家都是有铜钿人家，家产丰厚，被倻勒索去咯东西，再像一叠钞票堆里畀倻抽嘞索去，所以原来了，叫“打抽丰”。

后来么读瘪哉，就叫打秋风，随噶一读，反究越加有种趁火打劫的意思

俺今朝主要还是来讲讲奈格讴敲竹杠？大家都有数，敲竹杠就是指利用别人家的弱点，利用自咯有利地位，来敲诈勒索从中渔利；或者找各种各样咯借口向别人索取财物啊，哄抬价格啊等等“敲竹杠”葛咯出典有勿少，我都来话一遍：。

1.有一种话法：有铜钿人家或者手脚勿便咯人，夯四川进山烧香咯辰光，会乘一种用竹杆做的滑杆，滑杆由人抬嘞走走到半山腰，抬滑杆咯其中一个人就会敲敲滑杠，意思要加脚筋钿，否则就掼锣磁不抬哉，乘滑杆咯佬倌咸般就嘞依倻，加钞票。

2.第二种话法：老辈手里运输行业，做搬运做苦力咯佬倌，都用竹杠做挑挑抬抬咯手用家什，一般赚来咯辛苦铜钿都会囥夯竹杠里头有种嘎地痞流氓、工头恶霸会倻咯竹杠里敲敲，想晓得倻竹杠里头铜钿银子有勿有匟夯？毛估估有咯多少，扎么好趁机敲诈勒索倻！。

3.第三种话法：就是旧社会咯租界里，做巡捕咯印度阿三，会纠集一些地痞流氓，组成拆白党，专门拿嘞竹杠追来追去纠缠，去敲诈倻落单夯咯过路老百姓，从而呢进行敲诈勒索4.第四种话法：清朝倒灶前头，做小生意咯都是用铜板结算咯，为了方便，商家帐桌高头往往有竹筒摆夯，生意做来咯铜板都掼进咚掼进咚，要到夜头再倒出来盘点咯。

难话道有个商铺咯店王人品勿好，做人贪小看看豕猪戳嘞进咯客人来哉，伊就会竹筒敲敲，意思则店小二打暗切头，讴伊价钿讴些高后来葛桩事体传开，倻就话伊是敲竹杠5.第五种话法：是话农民起义军头头张献忠，总嘦看见贪官污吏、地痞流氓同来地主恶霸，抲牢就要杀。

当时葛批人晓得个个怕慌，其中有个知府老爷，搜刮来咯金银珠宝莫佬佬，靠奈格拿拿拉乡下头咯屋里起呢？伊想嘞咯办法，讴人去斫嘞所兴毛竹来，锯拉一人一庹长，竹节打通，金银珠宝囥进竹杠里头，再封口封牢打算讴一帮家人拉嘞好出城去哉。

城门口守城夯个几个当兵咯，看看是车毛竹，查嚡勿查，都手戉戉讴倻拉嘞好走哉勿晓得噶辰光，当兵咯里头有个老资格咯，手里拿嘞支旱烟管夯吃烟，伊经验随到坝，伊话毛竹究乡下头拉进城来咯，嚡里会原车头拉了下乡下头起？伊拿起烟管毛竹里“笃笃”磕嘞两记，话：哎，停落来，停落来，查查拉来。

知府大人自做咚咯生活自有数嗟，做贼心虚连忙则个老兵讴弄旁边，塞过去两锭银子，话：“偌咯位军爷辛苦，一些小意思，喝喝茶、喝喝茶”老兵想想出手嘎阔哒，咸般是有花头经咚哉，靠伊道旱烟管笃笃咯去磕嘞两记，葛撬去是烟灰磕磕还咯嗟，伊勿晓得花头经咯巧坎来咚嚡里里？概以，伊一头么则知府东怼绷意咯夯对闲白货拖延时间，一头么暗罗罗讴人去张献忠里汇报。

张献忠得到消息，趤趤叫就来哉，还勿走到，拨出大刀，将毛竹杠一劈两半。扎么事体败露，财物没收，知府抲牢杀头。

6.还有第六种话法：林则徐禁烟咯辰光，广州咯海面高头，一歇勿歇有官船夯趤牢，夯巡逻咯，为了查禁断命咯鸦片 有一日，巡逻官船拦牢嘞一艘走私船有一个文官模样咯人，手里驮了根旱烟管上了商船，监督手下人搜查，立嘞歇功夫，伊无意之中撑船咯船篙里去磕嘞磕烟袋里咯烟头烟灰，葛个动作，弄嘞走私商人心都慌煞。

原来商人倻是打通船篙，有鸦片匟进里头夯因为做贼心虚，对倻磕烟灰咯动作，走私商还道奥毛官员巧坎有数哉，来咚打暗切头伊连忙嬉皮笑脸套关系，趁人家勿注意，钞票塞进官员的手里头葛个贪官虽然勿晓得啥件头，不过，伊晓得咸般有花头经咚，概以一面么心领神会，一面么假痴假呆，命令手下放船。

后首，“敲竹杠”咯话法就是噶传开哉